‘n Splinternuwe toevoeging tot die Afrikaanse Taalmonument se baie gewilde somerpiekniekreeks is Afrikaanse flieks wat op ʼn buitelugskerm onder die sterre te sien sal wees. Die eerste piekniekfliek skop op Vrydag 14 November af met die Wes-Kaapse première van Anderkant die stilte.
Dié fliek van die bekroonde jong regisseur, Desmond Denton, is `n samesmelting van ou Afrikaanse drama en digkuns en bo alles, `n storie van hoop. Dit is verfilm in die hartjie van die Kaap en vertel die storie van `n uiteenlopende groep mense wat bymekaarkom om die teaterstuk van hul lewens op te voer – en veral hul stryd om te wys dat enigiets moontlik is wanneer mense saamwerk, maak nie saak watter ouderdom hulle is nie. Volgens Denton is dit `n klassieke storie oor die waarde wat elke mens het en hoe elkeen iets waardevols tot `n span kan bydra.
Van Suid-Afrika se mees legendariese Afrikaanse akteurs is in die fliek te sien, waaronder André Rossouw, Joey de Koker, Hannetjie Smit, Annemari Blanckenberg en Johan en Lida Botha. Hulle speel ‘n groep bejaardes in ‘n ouetehuis wat `n manier moet vind om nie slegs die teaterstuk saam te stel en op te voer nie, maar om dit boonop te doen onder die skerp oog van Sara, die matrone (gespeel deur De Koker) wat die tehuis met `n ystervuis regeer.
Die fliek is aangewys om by verskillende filmfeeste, insluitende die San Diego Internasionale Filmfees, vertoon te word. Dit is by die Kaapse Wynland Filmfees genomineer as een van Suid-Afrika se beste vollengte flieks. Die fliek het vier toekennings by die Monaco Internasionale Filmfees gewen, waaronder die toekenning vir beste ondersteunende akteur aan De Koker.
Die vertoning begin om 20:00 in die Tuinteater – ‘n kleinboetie van die groot Liquifruit Amfiteater – op die grasperk reg aan die voet van die monument. Die voorprogram begin om 18:30 en sluit optredes in deur die sangers Jody Williams en Carla Conradie, asook ‘n kort voorwoord deur dr Mario Denton. Besoekers is welkom om hul eie piekniekmandjie saam te bring of een by Volksmond Koffiewinkel te bestel (tel. 021 863 2800).
Kaartjies kos R90 (met ’n pakkie springmielies ingesluit) en is beskikbaar op www.webtickets.co.za, asook by Laerskool Hugenote op Wellington. Die tema is “Piekniek-sjiek op die rooi tapyt”. Gaste word aangemoedig om iets roois te dra. Bring ’n kombers of kussing en warm klere saam. Geen eie stoele word toegelaat nie. Stoele sal te huur wees teen R20 elk. Veilige parkering is beskikbaar en toegang word beheer. Geen honde of vure word toegelaat nie.
Indien die weer sleg is, word die piekniekfliek uitgestel na 16 November. Vir verdere inligting, skakel 021 863 4809/0543 of besoek www.taalmonument.co.za en www.facebook.com/afrikaansetaalmonument.
